மாசி

சூரியமான முறையில் கணிக்கப்படும் தமிழ் நாட்காட்டியின்படி ஆண்டின் பதினோராவது மாதம் மாசி ஆகும். சூரியன் கும்ப இராசியுட் புகுந்து அதைவிட்டு வெளியேறும் வரையிலான 29 நாள், 48 நாடி, 24 விநாடி கொண்ட கால அளவே இம் மாதமாகும். வசதிக்காக இந்த மாதம் 29 அல்லது 30 நாட்களை உடையதாகக் கொள்ளப்படும்.

மாசி மாதத்தில் சூரியனின் நிலை.

வசந்த காலத்தின் தொடக்கமாகவும், குளிர் மெல்ல குறைந்து வெப்பம் சீராகும் ஒரு இடைநிலைக் காலமாகவும் இம்மாதம் திகழ்கிறது.

ஆன்மீக ரீதியாக மாசி மாதம் சிவபெருமான் வழிபாட்டிற்கு மிகவும் உகந்ததாகும். இம்மாதத்தின் தேய்பிறை சதுர்த்தசி அன்று மகா சிவராத்திரி விழா கொண்டாடப்படுகிறது. அன்று இரவு முழுவதும் சிவ பக்தர்கள் விழித்திருந்து நான்கு கால பூசைகளில் பங்கேற்று இறைவனை வழிபடுகின்றனர். மேலும், இம்மாதத்தின் பௌர்ணமி அன்று வரும் மாசி மகம் திருவிழா மிகவும் புகழ்பெற்றது. இந்நாளில் புண்ணிய நதிகள், குளங்கள் மற்றும் கடல் போன்ற நீர் நிலைகளில் தீர்த்தவாரி உற்சவம் நடைபெறும். குறிப்பாகக் கும்பகோணத்தில் பன்னிரண்டு ஆண்டுகளுக்கு ஒருமுறை நடைபெறும் மகாமகம் விழா உலக அளவில் பிரசித்தி பெற்றது. தமிழ் நாட்டில் உள்ள பல கோயில்களில் மாசி தேரோட்டம் நடைபெறும்.

வாழ்வியல் முறையில் மாசி மாதம் பெண்களுக்குரிய மிக முக்கியமான நோன்பான காரடையான் நோன்பைக் கொண்டுள்ளது. மாசி மாதம் முடிந்து பங்குனி மாதம் பிறக்கும் வேளையில், சுமங்கலிப் பெண்கள் தங்கள் கணவர் நீண்ட ஆயுளுடன் வாழ வேண்டியும், திருமணமாகாத பெண்கள் நல்ல துணை அமைய வேண்டியும் இந்த நோன்பைக் கடைப்பிடிக்கின்றனர். மேலும், மாசி மாதத்தில் வரும் வளர்பிறை பஞ்சமி திருநாள் 'வசந்த பஞ்சமி' என்று கலைமகளுக்கு உரிய நாளாகக் கொண்டாடப்படுகிறது. வேளாண்மைத் தொழிலில் இது அறுவடைக்குப் பிந்தைய செழிப்பு மற்றும் அடுத்த பருவத்திற்கான திட்டமிடல் காலமாக அமைகிறது.

தமிழ் மாதங்கள்

வரிசை எண்	தமிழ் சூரிய மாதம்	ஆங்கில தேதிகள்	தமிழ் மாதம் (ஆங்கிலம்)	சந்திர மாதம் (சமஸ்கிருதம்)	சூரிய மாதம் (இராசி)	இராசி அடையாளம்	முக்கிய நட்சத்திரம்	சூரிய அடிப்படையிலான திருவிழாக்கள்	சந்திர அடிப்படையிலான திருவிழாக்கள்
1	சித்திரை	ஏப் 14 – மே 14	Chithirai	சைத்ர	மேழம் (மேஷம்)	வருடை (ஒரு வகை ஆடு)	சித்திரை நட்சத்திரம்	தமிழ்ப் புத்தாண்டு, சித்திரைத் திருவிழா	இராம நவமி, சித்திரா பௌர்ணமி
2	வைகாசி	மே 15 – ஜூன் 14	Vaikasi	வைசாக	விடை (ரிஷபம்)	காளை அல்லது ஆண் மாடு	விசாகம் நட்சத்திரம்	வைகாசி விசாகம்	நரசிம்ம ஜெயந்தி
3	ஆனி	ஜூன் 15 – ஜூலை 16	Aani	ஜ்யேஷ்ட	ஆடவை (மிதுனம்)	இரட்டைகள்	அனுசம்	ஆனி திருமஞ்சனம்	குரு பூர்ணிமா
4	ஆடி	ஜூலை 17– ஆக 16	Aadi	ஆஷாட	கடகம்	நண்டு	பூராடம் / உத்திராடம்	ஆடிப்பெருக்கு	ஆடி அமாவாசை, வரலட்சுமி நோன்பு
5	ஆவணி	ஆக 17 – செப் 16	Avani	ஷ்ராவண	சிங்கம் / மடங்கல் (சிம்மம்)	சிங்கம்	திருவோணம்	ஆவணி அவிட்டம்	கிருஷ்ண ஜெயந்தி, விநாயக சதுர்த்தி
6	புரட்டாசி	செப் 17 – அக் 17	Purattasi	பத்ரபாத	கன்னி	கன்னிப்பெண்	பூரட்டாதி / உத்திரட்டாதி	புரட்டாசி சனிக்கிழமை விரதம்	நவராத்திரி நோன்பு, விஜயதசமி
7	ஐப்பசி	அக் 18 – நவ 16	Aippasi	அஸ்வின	துலை (துலாம்)	இருபக்கத்திற்கும் நடுநிலையில் இருக்கும் துலாபாரம்	அச்சுவினி	அன்னாபிசேகம்	தீபாவளி, கந்த சஷ்டி
8	கார்த்திகை	நவ 17 – டிச 15	Karthikai	கார்திக	நளி (விருச்சிகம்)	தேள்	கிருத்திகை	கார்த்திகை விளக்கீடு	கார்த்திகை பூர்ணிமா
9	மார்கழி	டிச 16 – ஜன 13	Margazhi	மார்கஷீர்ஷ	தனுசு	வில் மற்றும் அம்பு சேர்ந்திருக்கும் ஒரு சிலை	மிருகசீரிடம்	வைகுண்ட ஏகாதசி	திருவாதிரை நோன்பு
10	தை	ஜன 14 – பிப் 12	Thai	பௌஷ	சுறவம் (மகரம்)	ஆடு	பூசம்	தைப்பொங்கல்	ரத சப்தமி
11	மாசி	பிப் 13 – மா 13	Masi	மக	குடம் (கும்பம்)	ஒரு பானையிலிருந்து பெருகியோடும் நீர்	மகம்	மாசி மகம்	மகா சிவராத்திரி
12	பங்குனி	மா 14 – ஏப் 13	Panguni	பல்குண	மீனம்	இரு மீன்கள்	உத்தரம்	பங்குனி உத்திரம்	ஹோலிகா தகனம்

இவற்றையும் பார்க்கவும்

• சந்திர மாதம்
• காலக்கணிப்பு முறைகள்
• இந்திய வானியல்

வெளியிணைப்புகள்

• ஆங்கில தேதியிலிருந்து தமிழ் தேதி வருவித்தல்
• தமிழ் நாட்காட்டி