பிளட் மணி
| பிளட் மணி | |
|---|---|
| இயக்கம் | சர்ஜுன் கே.எம் |
| தயாரிப்பு | இர்பான் மாலிக் |
| திரைக்கதை | சர்ஜுன் கே.எம் சங்கர் தாசு |
| இசை | சதீசு இரகுநாதன் |
| நடிப்பு | பிரியா பவானி சங்கர் மெட்ரோ சிறீசு கிஷோர் விசுருதா |
| ஒளிப்பதிவு | ஜி. பாலமுருகன் |
| படத்தொகுப்பு | பிரசன்னா ஜி. கே. |
| கலையகம் | எம்பரர் எண்டெர்டெயின்மெண்ட் |
| விநியோகம் | ஜீ5 |
| வெளியீடு | 24 டிசம்பர் 2021 |
| ஓட்டம் | 89 நிமிடங்கள் |
| நாடு | இந்தியா |
| மொழி | தமிழ் |
பிளட் மணி (Blood Money) என்பது 2021ஆம் ஆண்டு சர்ஜுன் கே. எம் இயக்கி இந்தியாவில் தமிழில் வெளியான பரபரப்பூட்டும் திரைப்படமாகும். இத்திரைப்படத்தினை எம்பரர் எண்டெர்டெயிண்ட்மெண்ட் நிறுவனம் தயாரித்துள்ளது. எசு. நபில் அகமதுவின் கதையினைத் திரைக்கதையாக சர்ஜுன் கே. எம்., சங்கர் தாசு எழுதியுள்ளார்.[1] இப்படத்தில் பிரியா பவானி சங்கர், மெட்ரோ சிரிசு, கிஷோர் ஆகியோர் முக்கிய வேடங்களில் நடித்துள்ளனர். குவைத்து சிறையில் உயிருக்கு ஆபத்தான நிலையில் இருக்கும் இரண்டு பேரைக் காப்பாற்றப் போகும் தமிழ்நாட்டைச் சேர்ந்த ஒரு பத்திரிகையாளரைச் சுற்றி இத்திரைப்படக் கதை சுழல்கிறது.[2] இத்திரைப்படம் 2021 டிசம்பர் 24 அன்று ஜீ5-இல் வெளியிடப்பட்டது.[3]
கதை
ரேச்சல் விக்டர் செய்தி நிறுவனம் ஒன்றில் பத்திரிகையாளராக உள்ளார். சமீபத்தில் இவருக்குத் துணை ஆசிரியராகப் பதவி உயர்வு வழங்கப்படுகிறது. இவருடைய முன்னோடியான சுதன் தனது பணியின் கடைசி நாளில் இருக்கிறார். இதற்கிடையில், இரண்டு தமிழர்கள் குவைத் சிறையில் கைதிகளாக உள்ளனர். இவர்கள் அடுத்த நாள் தூக்கிலிடப்பட உள்ளனர். இந்த இருவரின் தாய் மாவட்ட ஆட்சியர் மூலம் ஒரு முறையீடு செய்கிறார். ஆட்சியர் சட்ட நடைமுறைகளை மேற்கொள்ள அறிவுறுத்துகிறார். மேலும் ஒரு வேண்டுகோள் காணொளியினை உருவாக்கி சமூக ஊடகங்களில் பரப்பும்படி கேட்டுக்கொள்கிறார்.
இந்தக் காணொளியினைக் காணும் ரேச்சல் அவர்களுக்கு உதவ முடிவு செய்கிறாள். குவைத்தில் இலங்கைப் பெண்ணை கொலை செய்ததாக அந்த ஆண்கள் மீது குற்றம் சாட்டப்பட்டதாகவும், அவர்கள் நிரபராதி என்றும், கடந்த ஐந்து ஆண்டுகளாகச் சிறையில் இருப்பதாகவும் அவர் அறிந்துகொள்கிறார். தமிழ்நாட்டில் உள்ள ஒரு முசுலீம் அமைப்பு மூலம், பாதிக்கப்பட்டவருக்கு இரத்தப் பணம் வழங்க இருவரின் சார்பாக ஏற்பாடு செய்யப்பட்டது. குவைத் சட்டத்தின்படி, பாதிக்கப்பட்டவரின் குடும்பத்தினர் இருவருக்கும் மன்னிப்புக் கடிதத்தை வழங்கினால், அவர்கள் காப்பாற்றப்படுவார்கள்.
இலங்கைப் போரினால் இடம்பெயர்ந்தவர்கள் என்பதால் பாதிக்கப்பட்டவரின் குடும்பத்தினருக்கு இரத்தப் பணம் கிடைக்கவில்லை என்பதைச் சில முன்னாள் அரசாங்க அதிகாரிகள் மூலம் ரேச்சல் அறிந்துகொள்கிறார். தூக்கிலிடும் நேரம் நெருங்குகையில், மன்னிப்புக் கடிதத்தைப் பெறுவதே இருவரையும் காப்பாற்றுவதற்கான ஒரே வழி என்று அவள் உணர்கிறார். ரேச்சலும் சுதனும் படகு மூலம் இலங்கை சென்று பாதிக்கப்பட்டவரின் குடும்பத்தைக் கண்டுபிடிக்கின்றனர். அவர்கள் உண்மையிலேயே அப்பாவி என்பதால் இருவரையும் மன்னிக்குமாறு அவர்களை நம்பவைத்து, அவர்களின் உயிரைக் காப்பாற்ற அவர்களின் உதவியைக் கேட்கிறார். முதலில் தயக்கம் காட்டிய குடும்பத்தினர் இறுதியாக ஒப்புக்கொள்கிறார்கள். அவர்கள் இருவரையும் மன்னித்து, தங்கள் அறிக்கையினைக் காணொளியாகப் பதிவு செய்கிறார்கள். ரேச்சல் இந்த காணொளியினை குவைத்தில் உள்ள வழக்கறிஞருக்கு அனுப்புகிறார். அவர் தண்டனை நிறைவேற்றப்படுவதைத் தடுக்கச் சரியான நேரத்தில் தலையிட்டு இருவரையும் காப்பாற்றுகிறார். இவர்கள் இறுதியாக ஆறு மாதங்களுக்குப் பிறகு விடுவிக்கப்படுகின்றனர். இவர்கள் இருவரும், ரேச்சலுக்கு நன்றி கூறி, தங்கள் குடும்பத்தைச் சந்திக்க வீட்டிற்குத் திரும்புகிறார்கள்.
நடிப்பு
- ரேச்சல் விக்டராக பிரியா பவானி சங்கர்
- சுதனாக மெட்ரோ சிரிசு
- காளியப்பனாக கிஷோர்
- காளியப்பனின் மகளான சுகந்தியாக பேபி விசுருதா
- சுப்பு பஞ்சு
- வினோத் சாகர்
- சிறீலேகா ராஜேந்திரன்
- செந்தில்குமரன்
வெளியீடு
பிளட் மணி திரைப்படம் 24 திசம்பர் 2021 அன்று ஜீ5-இல் வெளியிடப்பட்டது. இத்திரைப்படம் விமர்சகர்களிடமிருந்து நல்ல விமர்சனங்களைப் பெற்றது.
விமர்சனம்
தி டைம்ஸ் ஆப் இந்தியாவின் லோகேசு பாலச்சந்திரன் இப்படத்திற்கு 5க்கு 2.5 நட்சத்திரங்களுடன் மதிப்பிட்டார். "பிளட் மணி ஒரு நல்ல திருப்பங்களுடன் கூடிய பரபரப்பூட்டும் திரைப்படம் ஆகும்.[4] ஆனால் பலவீனமான திரைக்கதை காரணமாகப் பார்வையாளர்களை ஈர்க்கத் தவறிவிட்டது."[5] பிகைண்ட்வுட் 5க்கு 2.5 மதிப்பீட்டைக் கொடுத்தது. "பிளட் மணி பார்க்கக்கூடிய பரபரப்பூட்டும், சுவாரசியமான திரைப்படம் என்றும் இதனை இன்னும் சிறப்பாகக் கையாளப்பட்டிருக்கலாம்." பிகைண்ட்வுட் என்றும் தெரிவித்தது.
மேற்கோள்கள்
- ↑ "I enjoy directing more than writing: Sarjun KM". The New Indian Express. 20 December 2021. Archived from the original on 20 December 2021. Retrieved 20 December 2021.
- ↑ "First look of Priya Bhavani Shankar's Blood Money out". Cinema Express. 12 December 2021. Archived from the original on 12 December 2021. Retrieved 12 December 2021.
- ↑ "Full Circle: Ex-journalist Priya Bhavani Shankar now plays a journo in 'Blood Money'". DT Next. Archived from the original on 28 December 2021. Retrieved 14 December 2021.
- ↑ "Blood Money Review: Priya Bhavani Shankar and Kishore lift this emotional thriller". The Times of India இம் மூலத்தில் இருந்து 23 December 2021 அன்று. பரணிடப்பட்டது.. https://web.archive.org/web/20211223051200/https://timesofindia.indiatimes.com/web-series/reviews/tamil/blood-money/ottmoviereview/88318485.cms.
- ↑ "Blood Money Movie Review". Behindwoods. 23 December 2021. Archived from the original on 23 December 2021. Retrieved 24 December 2021.