விட்டன் விளைவு
விட்டன் விளைவு (Whitten effect) என்பது இனப்பெருக்க உயிரியல் துறையில் காணப்படும் ஒரு நிகழ்வு ஆகும். ஆண் விலங்கின் இனக்கவர்ச்சி இயக்குநீர் மூலம், பெண் விலங்குக் கூட்டமொன்றில் ஒத்திசைவான இனப்பெருக்க வேட்கையைத் தூண்டுவது விட்டன் விளைவு எனப்படுகிறது.[1]
பெண் எலிகள் தனியாக ஒரு குழுவாக வைத்திருக்கப்படும்போது, அவற்றின் இனப்பெருக்கச் சுழற்சிகள் ஒவ்வொன்றாக மாறுபட்டு இருக்கும். ஆனால், அந்தக் குழுவில் ஓர் ஆண் எலியை அறிமுகப்படுத்தினால் அல்லது ஆண் எலியின் இனக்கவர்ச்சி இயக்குநீர் மணத்தை அவை உணர்ந்தால், பெண் எலிகளின் இனப்பெருக்கச் சுழற்சிகள் ஒரே நேரத்தில் ஒத்திசைவடைகின்றன. இதுவே விட்டன் விளைவு எனப்படுகிறது.
சமூக சமிக்ஞைகள், அல்லது சமூக தூண்டுதல்கள், அனைத்து பாலூட்டிகளிலும் இனப்பெருக்கத்தில் ஒரு விளைவைக் கொண்டுள்ளன. சில பெண் எலிகளுக்கு, ஆண் எலிகளின் சிறுநீரில் உள்ள இனக்கவர்ச்சி இயக்குநீர் அத்தகைய தூண்டுதல்களாக இருக்கலாம், ஒத்திசைவான இனப்பெருக்கச் சுழற்சியைத் தூண்டலாம்.[2]
இவ்விளைவு வெசுலி கே. விட்டன் (1956, 1966, 1968) என்பவரால் கண்டறியப்பட்ட ஒரு நிகழ்வாகும். எனவே அவரின் பெயரால் இந்த விளைவு அழைக்கப்படுகிறது. இதன் மூலம், ஆண் எலியின் இனக்கவர்ச்சி இயக்குநீர் செறிந்த சிறுநீர், ஒரே பாலினத்தைச் சேர்ந்தவையாகக் குழுவாக்கப்பட்ட பெண் எலிகளுக்கு இடையே இனப்பெருக்கச் சுழற்சியை ஒருங்கிணைக்கிறது. மேலும், 'புரூசு விளைவைப் போலவே, எலிகளில் ஆண்களிடமிருந்து பெண்களுக்கு ஏற்படும் இனக்கவர்ச்சி இயக்குநீர் சார்ந்த விளைவுகளுக்கு இது ஒரு சிறந்த எடுத்துக்காட்டாகும்.[3]
பெண் எலிகளின் ஒரு குழுவானது, ஆண் எலியால் வெளியேற்றப்படும் சிறுநீருக்கு உட்படுத்தப்படும்போது விட்டன் விளைவு ஏற்படுகிறது. அந்த ஆண் எலியின் சிறுநீரில், பெண் எலிகளின் இனப்பெருக்க நிலையைக் கட்டுப்படுத்தும் இயக்குநீர் சார்ந்த செயல்முறைகளைப் பாதிக்கக்கூடிய, ஆவியாகும் தன்மை கொண்ட அல்லது காற்றில் பரவக்கூடிய இனக்கவர்ச்சி இயக்குநீர் அடங்கியுள்ளது. விட்டன் விளைவை ஏற்படுத்தும் இனக்கவர்ச்சி இயக்குநீரில் 'டெசுட்டோசுடிரோன்' போன்ற ஆண் பாலியல் இயக்குநீர் சார்ந்திருப்பதால், பாலியல் முதிர்ச்சியும் இனப்பெருக்கத் திறனும் கொண்ட ஒரு ஆண் எலியே இச்சிறுநீரை வெளியேற்ற வேண்டும்.
விட்டன் விளைவை உருவாக்க, பெண் எலிகளுக்கு ஆண் எலியின் சிறுநீருடன் நேரடித் தொடர்பு தேவையில்லை, ஏனெனில் சிறுநீரில் உள்ள இனக்கவர்ச்சி இயக்குநீர் காற்றில் பரவக்கூடியது, எனவே அது பெண் எலிகளால் அவற்றின் நுகர்வு அமைப்பு மூலம் எடுத்துக்கொள்ளப்படுகிறது.[4] தனிமையில் உள்ள பெண் எலிகளின் இனப்பெருக்கச் சுழற்சி சுமார் 4 முதல் 5 நாட்கள் ஆகும். மேலும் கூட்டமாக உள்ள பெண் எலிகளின் இனப்பெருக்கச் சுழற்சிகள் பெரும்பாலும் நீண்டதாகவும் ஒழுங்கற்றதாகவும் இருக்கும்.[5] இருப்பினும், குழுவாக உள்ள பெண் எலிகள் ஓர் ஆண் எலியின் சிறுநீரில் உள்ள இனக்கவர்ச்சி இயக்குநீருக்கு வெளிப்படுத்தப்படும்போது, விட்டன் விளைவு ஏற்படுகிறது, மேலும் பெரும்பாலான பெண் எலிகள் வெளிப்படுத்தப்பட்ட மூன்றாவது நாளுக்குள் ஒரு புதிய இனப்பெருக்கச் சுழற்சியில் நுழையும்.
இருப்பினும், மனிதர்களில் இதேபோன்ற செயல்பாட்டைக் கொண்ட வோமெரோநாசல் அல்லது நுகர்வு மண்டலம் (புரூசு, வாண்டன்பெர்க் மற்றும் விட்டன் விளைவுகளைத் தொடங்கும் உணர்ச்சி உறுப்பு என்று கருதப்படுவது) இருப்பதற்கான சான்றுகள் குறைவாகவே உள்ளன. கருதப்படும் தூண்டுதல் மற்றும் நரம்பியல் பாதை (அத்துடன் கவனிக்கப்பட்ட இனங்கள்) ஆகியவற்றில் உள்ள இந்த வேறுபாடுகள், விட்டன் மற்றும் மெக்ளின்டாக்கு விளைவுகளைத் தெளிவாக வேறுபடுத்துகின்றன, ஏனெனில் பிந்தையது ஆண் இனக்கவர்ச்சி இயக்குநீரின் பங்கைக் குறிப்பிடவில்லை.
மேற்கோள்கள்
- ↑ Carlson, Neil R. (2013). Physiology of behavior (11th ed.). Boston: Pearson. p. 335. ISBN 978-0205239399.
- ↑ Ochiogu, Izuchukwu S., Chike F. Oguejiofor, and Ambrose N. Nwagbo. "Males' Non-Enhancement of Bruce and Whitten Effects in Female Mice – Mus Musculus." Animal Research International 6 (2009): 1077-081.
- ↑ Jemilio, Bozena, Scott Harvey, and Milos Novotny. "Promotion of the Whitten Effect in Female Mice by Synthetic Analogs of Male Urinary Constituents." Proceedings of the National Academy of Sciences of the United States of America 83 (1986): 4576-579.
- ↑ Gangrade, B.K., and C.J. Dominik. "Studies of the Male-Originating Pheromones Involved in the Whitten Effect and Bruce Effect in Mice." Biology of Reproduction 31 (1984): 89-96.
- ↑ Ma, Weidong, Zhongshan Miao, and Milos V. Novotny. "Introduction of Estrus in Grouped Female Mice (Mus Domesticus) by Synthetic Analogs of Preputial Gland Constituents." Chem. Senses 24 (1999): 289-93.